UNHCR waxay ka go’an tahay badbaadadaada. Nasiib darro, waxaa jira shaqsiyaad iyo kooxo isku dayi kara inay ka faa’iidaystaan xaaladdaada iyagoo adeegsanaya barnaamijyo been abuur ah, fariimo, wicitaanno, iyo khiyaanooyin baraha bulshada ah oo ballanqaadaya caawimo ama adeegyo iyagoo ku beddelanaya lacag ama macluumaad shakhsiyeed.
Hababka khiyaanada ee caadiga ah:
- Barnaamijyo iyo mareegaha been abuur ah: Ku dayashada UNHCR ama safaarado si loo xado macluumaad ama loo codsado lacag.
- Iimayllo iyo fariimo qoraal ah oo khiyaano ah: Iska dhigaya inay ka yimaadeen UNHCR ama hay’ad kale, iyagoo codsanaya xog shakhsiyeed ama lacag.
- Khiyaanooyinka taleefanka: Dadka wax khiyaameeya ayaa ku soo wici kara iyagoo iska dhigaya shaqaale UNHCR ah ama matalaya hay’ado kale si ay kuu khiyaaneeyaan oo ay kuugu weydiiyaan macluumaad shakhsiyeed ama lacag.
- Khiyaanooyinka baraha bulshada: Ballanqaadyo been ah oo caawimo ama adeegyo ah oo lagu beddelanayo lacag ama xog shakhsiyeed.
- Khiyaanooyinka fariimaha (Telegram, WhatsApp, iwm.): Dadka wax khiyaameeya oo ballanqaadaya dib-u-dejinta ama dedejinta diiwaangelinta UNHCR ama hay’adaha qaranka iyagoo ku beddelanaya lacag ama macluumaad shakhsiyeed.
Iska ilaali naftaada iyo bulshadaada:
- Hubi isha: mar walba hubi fariin kasta oo aad hesho. UNHCR waligeed lacag kuma weydiisan doonto adeeg ama caawimo kasta, mana weydiisan doonto macluumaad shakhsiyeed iyada oo loo marayo kanaallo aan rasmi ahayn.
- Ha wadaagin macluumaad shakhsiyeed: waligaa ha la wadaagin macluumaadkaaga shakhsiyeed, sida lambarka dukumentiga aqoonsiga, faahfaahinta bangiga, ama furaha sirta ah, qof aadan garanayn ama aadan ku kalsoonayn.
- Soo sheeg dhaqdhaqaaq shaki leh: haddii aad ka shakido khiyaano, si degdeg ah u ogeysii UNHCR iyo hay’adaha maxalliga ah. Warbixintaadu waxay sidoo kale ka caawin kartaa ilaalinta dadka kale.
- Isticmaal kanaallada rasmiga ah: booqo bogga rasmiga ah ee UNHCR, bogagga HELP, ama la xiriir xafiiska UNHCR ee kuugu dhow si aad u hesho macluumaad la xaqiijiyay.
- Taageerada bulshada: la wadaag bulshadaada macluumaadka ku saabsan khiyaanada si loo hubiyo in qof walba feejignaan iyo badbaado yeesho.
Haddii aad noqoto dhibbane khiyaano, ku wargeli UNHCR ama hay’adaha maxalliga ah dhacdada!
Markaad soo sheegaysid, bixi macluumaad intii suurtagal ah, oo ay ku jiraan fariin kasta oo aad heshay iyo faahfaahinta dadka ku lug leh.
UNHCR ma baari karto khiyaano ay geysteen dad aan ka shaqayn UNHCR ama hay’adaha la-hawlgalaya, ama aan ahayn dad si khasab ah loo barakiciyay; baaritaannada noocaas ah waxaa maamula hay’adaha maxalliga ah.
Si kastaba ha ahaatee, soo sheegidda khiyaano noocaas ah ee UNHCR weli waa muhiim, maadaama ay ka caawiso helitaanka taageero iyo sidoo kale ka digidda dadka kale ee barakacayaasha ah ee khiyaanadaas.
Adeegyada UNHCR waa bilaash. Feejignow oo ka ilaali naftaada iyo dadka kale khiyaano!
Macluumaad dheeraad ah, fadlan booqo “Reporting Misconduct”.
