Regilarizasyon dokimantè moun Ayisyen nan Brezil
Moun Ayisyen yo ka chwazi ant de fason pou jwenn dokiman nan Brezil: demand azil oswa pèmi rezidans tanporè.
Tou de pèmèt aksè a dwa ak sèvis esansyèl pou rekonstwi lavi nan Brezil ak diyite ak sekirite, tankou travay, sante, edikasyon, pwoteksyon sosyal, elatriye. Sepandan, gen kèk diferans enpòtan ant yo.
Byenke refijye ak migran gen dwa debaz ki sanble nan Brezil, se sèlman refijye (ak moun k ap chèche demand azil) ki gen aksè a pwoteksyon entènasyonal, ki gen ladan garanti adisyonèl. Jwenn plis enfòmasyon sou paj Diferans ant estati refijye ak pèmi rezidans.
Si w bezwen èd, kontakte òganizasyon patnè UNHCR ki pi pre a.
Estati refijye
Estati refijye se yon fòm pwoteksyon ki disponib pou moun ki kite peyi orijin yo “akòz laperèz fondasyonèl pou pèsekisyon pou rezon ras, relijyon, nasyonalite, gwoup sosyal oswa opinyon politik, oswa tou akòz yon sitiyasyon grav ak jeneralize nan vyolasyon dwa moun”.
Nan lòt mo, yo konsidere kòm refijye moun ki te oblije soti nan peyi li paske li pa t an sekirite, li te kouri devan yon sitiyasyon vyolans ak ensekirite – ki ka koze tou pa aktè leta ak pa lòt gwoup, tankou gang kriminèl. Moun sa yo pa ka retounen nan peyi yo, paske yo riske sibi domaj. Kòm otorite peyi orijin lan pa kapab ofri pwoteksyon, yo ka chèche “pwoteksyon entènasyonal” nan yon lòt peyi.
Estati refijye ka mande nan nenpòt moman, san konsiderasyon viza ki te itilize pou antre nan Brezil. Li pa obligatwa prezante dokiman pou fè demann nan. Sepandan, si moun nan gen kèk dokiman ki ka ede pwouve sitiyasyon li, li enpòtan pou l prezante l. Jwenn plis enfòmasyon sou pwosesis etap pa etap pou aplike pou estati refijye.
Rezidans
Rezidans se yon dokiman migrasyon ki pèmèt rete regilyèman nan Brezil. Chak kalite pèmi rezidans gen kritè ak dokimantasyon espesifik ki dwe respekte pou demann lan. Jwenn plis enfòmasyon sou pwosesis etap pa etap demann yon pèmi rezidans.
Moun ki gen viza imanitè (Afgan, Ayisyen ak Siri), ansanm ak Venezwelyen yo, ka mande yon pèmi rezidans tanporè pou rezon imanitè. Moun ki rive nan Brezil ak yon viza reyinyon fanmi ka mande yon pèmi rezidans tanporè ki baze sou reyinyon fanmi. Pou mande yon rezidans pa lyen familyal, li endispansab ke manm fanmi an ki te mande viza a prezan, ansanm ak moun ki fèk rive a, nan moman sèvis nan Polis Federal la.
